Qahira,(insidesomalia.org)-Guddoomiyaha Isbahaysiga dib u xorreynta Somalia, Sheekh Shariif Sheekh Axmed ayaa ugu baaqay dowladaha carabta in ay Somaaliya usoo diraan Ciiddamo Carbeed oo badala Ciidamada Itobia ee ku sugan gudaha dalka Somaliya.

Sheekh Shariif oo ay wehliyaan mas’uuliyiin ka tirsan Isbahaysiga Dib u xoreynta oo booqasho hada ku jooga Magaalada Qaahira ee dalka Masar ayaa waxa ay la kulmeen kaaliyaha xoghayaha guud ee Ururka Jaamacadda Carabta ugu qaabilsan dhinaca Siyaasadda, Ambassador Axmed Bin Xilli iyo agaasimaha aaaxda iskaashiga Carabta iyo Afrika ee Ururka Jaamacadda Carabta, Ambassador Samiir Xusni.

"Ciiddamadda Carabta ayaa aas-aas u noqon doona Ciiddamo kasta oo caalami ah oo loo soo daad gureynayo dalka Soomaaliya, si ay u beddelaan Ciiddaamadda Itobia ee duulaanka ku qabsaday dalkeenna", ayuu yiri Sheekh Shariif Sheekh Axmed oo tilmaamay inay ka go’an tahay Isbahaysiga inay Ciiddamadda Itobia ka saaraan dalka Soomaalia.

Sheekh Shariif, waxa uu sheegay in loo baahan yahay inay Dowladaha Carabta u istaagaan sidii wax looga qaban lahaa xiisadaha ka taagan dalka Soomaaliya iyo sidii ay Ciiddamo Carbeed loogu soo diri lahaa dalka Soomaaliya.

Mar wax laga weydiiyey inay ciiddamadda Somaliya awoodi karaan inay nabad ku soo dabaalaan dalka Somalia, waxa uu farta ku fiiqay inay ciiddamadda Soomaalida gacan siin doonaan ciiddamadda dowladaha Carabta ee hawlaha nabad-ilaalinta loogu soo dirayo dalka Somalia.

Kaaliyaha Xoghayaha Guud ee Ururka Jaamacadda Carabta ugu qaabilsan dhinaca Siyaasadda, Ambassador Axmed Bin Xilli, oo kulankaasi kadib la hadlay Suxufiyiinta, ayaa sheegay in ay Wafdiga Soomaalida u soo gudbiyeen codsiyo badan intii uu kulanka la lahaa, kuwaasi oo uu xusay inay ugu muhiimsan yihiin:-

In ay Dowladaha Carabta door wanaagsan ka qaadato sidii uu Ururka Jaamacadda Carabta Ciiddamo Nabad ilaalin oo u gaar ah loogu soo diri lahaa dalka Soomaaliya ama ay qeyb ka noqdaan Ciiddamadda Qaramada Medoobey ee loo soo dirayo dalka Soomaaliya.

-· Inay dowladaha Carabta gacan ka geystaan taageero dhinaca Samafalka iyo Waxbarashadda ee dalka Somalia.

Ambassador Axmed Bin Xilli, waxaa kaloo uu sheegay inay Ergooyin ka socda Ururka Jaamacadda Carabta u soo diri doonaan dalka Somalia, marka la sugo ammaanka guud ee dalka Somaliya.